КИЛИС (АА) - Сириските деца родени во Туркије за првпат ќе ја видат својата татковина, по падот на сирискиот режим на Башар ал-Асад, јавува Анадолу.
Сиријците кои се засолнија во Туркије по почетокот на граѓанската војна во нивната земја, продолжуваат да се враќаат во својата татковина со падот на режимот.
Семејствата ги завршуваат формалностите на турскиот граничен премин со Сирија, Онџупинар, во Килис, од каде што ќе влезат во Сирија по бранот враќања по падот на режимот на партијата Баас, која владееше во земјата 61 година.
Меѓу нив е и Махмуд Хамидо, кој дошол во Туркије пред 11 години со својата сопруга Сабил. Тие прво дошле во Истанбул, а потоа во Кајсери. Во овој период парот работел на различни работни места и во Туркије им се родиле сите пет деца, Али (10), Зекерија (7), Рукије (3), Камер (2) и Џемил (1).
Хамидо за АА изјави дека кога започнала граѓанската војна во Сирија тој штотуку се оженил и дека со сопругата се засолнил во Туркије. Вели дека многу ја сака Туркије и дека заедно со неговите деца ќе одат во Алепо, среќен што повторно ќе го види своето огниште.
Децата на семејството Хамидо, кои никогаш претходно не биле во Сирија, за прв пат ја доживуваат возбудата на заминување во татковината.
„Враќањето во својата татковина, во местото на кое му припаѓаме, е секогаш голем благослов. Туркије е одлична, но да се биде во сопствената земја е едноставно неспоредливо“, рече тој.
Со сопругата и трите деца се враќа и Валид ал Шеик, кој во Газиантеп пристигна пред 12 години. Раскажувајќи дека во Туркије работел во текстилна фабрика, Ал Шеик рече дека со сопругата Нур имаат 3 деца, Абдулазиз (8), Хани (2) и Халид (1), сите родени во Туркије.
„Туркије ни ги отвори вратите, го засакавме ова место и се зближивме со нејзиниот народ. Но, сега е време да се вратиме назад“, рече тој, надевајќи се на нов почеток во Сирија.
