СЗО ги осудува нападите врз украинските здравствени установи

ЖЕНЕВА (АА) - Директорот на Канцеларијата на Светската здравствена организација (СЗО) за Европа, Ханс Клуге, денес изјави дека се потврдени 16 напади врз украинските здравствени установи откако Русија ја започна војната во Украина, нагласувајќи дека здравствените работници, болниците и медицинските установи никогаш не смеат да бидат цел во конфликтите, јавува Агенција Анадолија (АА).

„До денес имаме 16 потврдени извештаи за напади врз здравствени установи во Украина, а уште извештаи се проверуваат. СЗО силно ги осудува овие напади врз здравствените установи“, рече Клуге на прес-конференцијата.

Тој нагласи дека приоритет на СЗО е да обезбеди здравствена заштита за цивилите и бегалците, внатре и надвор од Украина.

„Здравствените работници, болниците и другите медицински установи никогаш не смеат да бидат цел во ниту еден момент, вклучително и во кризи и конфликти“, нагласи Клуге, додавајќи дека здравствениот систем на Украина е под голем притисок.

Тој посочи дека недостасуваат основни средства и лекови за спасување животи, како кислород и инсулин, лична заштитна опрема, хируршки материјал, анестетици и крв.

Според неговите зборови, на пат кон Украина има две пратки, 76 тони медицински материјали за трауматски и итни состојби, како и замрзнувачи, фрижидери, пакети со мраз и кутии за ладење.

„Имаме дополнителни пратки од 500 концентратори на кислород, како и повеќе материјали“, истакна Клуге.

Тој додаде дека еден од приоритетите на СЗО е да обезбеди соседните земји да имаат инфраструктура и експертиза за да ги задоволат итните здравствени потреби на оние што доаѓаат.

СЗО распореди експертски тимови во Унгарија, Полска, Молдавија и Романија.

Според податоците на Агенцијата за бегалци на Обединетите нации, околу два милиони луѓе, главно жени и деца, досега ја напуштиле Украина.