Саудиска Арабија ја поздрави можната средба на Трамп и Путин во кралството

Саудиска Арабија денес го поздрави неодамнешниот телефонски разговор меѓу американскиот претседател Доналд Трамп и рускиот претседател Владимир Путин и идејата за нивна средба во кралството, пренесува Анадолу.

„Кралството Саудиска Арабија го поздравува телефонскиот разговор меѓу претседателот Доналд Трамп, претседател на Соединетите Американски Држави и претседателот Владимир Путин, претседател на Руската Федерација на 12 февруари 2025 година, како и најавата за можноста за одржување средба на која ќе присуствуваат нивните екселенции, двајцата претседатели, во Кралството Саудиска Арабија“, се вели во соопштението на саудиското Министерство за надворешни работи.

„Кралството ја изразува својата гостопримливост да биде домаќин на средбата во Саудиска Арабија“, соопшти Министерството, потврдувајќи ги „своите тековни напори за постигнување траен мир меѓу Русија и Украина“.

Министерството истакна дека „во текот на изминатите три години, кралството продолжи со овие напори на домаќин на бројни состаноци за ова прашање“.

Трамп во средата, откако разговараше со Путин, рече дека се согласиле „веднаш“ да започнат преговори за ставање крај на тригодишната војна во Украина. Тој разговараше и со украинскиот претседател Владимир Зеленски.

Одделно, во изјава за новинарите во Овалната соба, Трамп рече дека би можел да се сретне со Путин во „не толку далечна иднина“ за да се стави крај на „крвавата ужасна војна“.

Портпаролот на Кремљ, Дмитриј Песков, рече дека процесот на договарање на средбата меѓу двајцата лидери може да потрае неколку месеци.