Mustafa Deveci
02 Септември 2020•Ажурирај: 03 Септември 2020
ЕРУСАЛИМ (АА) - Саудиска Арабија соопшти дека дозволува користење на нејзиниот воздушен простор за летовите меѓу Израел и Обединетите Арапски Емирати (ОАЕ), пренесува Агенција Анадолија (АА).
Според веста на државната саудиска информативна агенција СПА, Агенцијата за цивилно воздухопловство на Саудиска Арабија го одобрила барањето на Абу Даби за користење на воздушниот простор на Саудиска Арабија.
Со оваа одлука отворен е патот за израелските авиони да го користат воздушниот простор на Саудиска Арабија за летовите кон ОАЕ.
Во својата видеоизјава, израелскиот премиер Бенјамин Нетанјаху одлуката ја нарече „голем настан“. „Ова е плод на вистинскиот мир. На овој начин цените на летовите ќе се намалат, растојанието ќе се скрати и нашиот туризам ќе се подобри.“
Иако сè уште не е познато кога ќе започнат редовните летови меѓу Израел и ОАЕ, кои постигнаа договор за нормализирање на односите, израелските власти велат дека летовите меѓу Тел Авив и Абу Даби може да започнат кон крајот на годината
Првиот комерцијален лет меѓу Тел Авив и Абу Даби се реализира во понеделникот. Саудиска Арабија за првпат во историјата им дозволи на израелските авиокомпании да го користат нејзиниот воздушен простор.
