Ekipa
06 Април 2025•Ажурирај: 07 Април 2025
ЊУЈОРК (АА) - Илјадници демонстранти излегоа на улиците на Њујорк и другите градови низ Соединетите Американски Држави (САД), за да го изразат своето неодобрување на чекорите на администрацијата на претседателот Доналд Трамп како дел од масовните протести насловени „Рацете подалеку“, јавува Анадолу.
Стотици илјади Американци излегоа на улиците низ земјата за да протестираат против политиките на претседателот Доналд Трамп и бизнис магнатот Илон Маск, кој е негов висок советник и го предводеше неофицијалниот Оддел за владина ефикасност (DOGE), кој беше клучен за значителните отпуштања во федералната влада, користејќи го мотото „Рацете подалеку“.
Протестите низ целата земја, кои се одржаа на речиси 1.000 локации, вклучувајќи ги и големите градови како Вашингтон, Њујорк, Чикаго, Бостон и други, привлекоа стотици илјади луѓе, според организаторите.
Демонстрантите носеа транспаренти со пораките „Фашизмот нема место овде“, „САД немаат крал“ и „Рацете подалеку од нашата демократија“.
Многу демонстранти експлицитно ги нападнаа Трамп и Маск, со транспаренти „Никој не го избра Илон Маск“ и „Без кралеви, без автократи, без фашисти“.
Демонстрациите беа организирани од движењето 50501, именувано по неговата цел „50 протести, 50 држави, 1 движење“. Групата повика на акција преку социјалните мрежи: „Доналд Трамп и Илон Маск мислат дека оваа земја им припаѓа ним. Тие земаат сѐ што ќе им дојде до рака и го предизвикуваат светот да ги спречи“.
„Ако не се бориме сега, нема да остане ништо за спасување“, предупреди групата во промотивните материјали.
Со транспарентите на протестите се дадоа различни пораки, меѓу кои и „Рацете подалеку од социјалното осигурување, Медикер, нашите училишта и нашите сојузници“ и „Рацете подалеку од Украина, Судан, Палестина, ДРК и Хаити“.
Претставникот на Мериленд, Џејми Раскин, говорејќи на собирот во главниот град на САД, апелираше до владата на Трамп „рацете подалеку“ од Канада, Гренланд и Панама, бидејќи тие се независни земји.
„Медиумите имаат право да го наречат Мексиканскиот Залив Мексикански Залив“, додаде тој, критикувајќи го потегот на администрацијата да го смени името во Американски Залив и принудувајќи ги медиумите да го следат.
Ова се четврти масовни протести на национално ниво организирани од движењето 50501, кое претходно одржа протести на 5 февруари, 17 февруари и 4 март.
Според организаторот Кеј Еверт, движењето настанало на Редит пред да добие поддршка од активистички организации. „r/50501“ сега има повеќе од 246.000 членови.
