Израел го запре 70 отсто од водоснабдувањето на Газа

ГРАД ГАЗА (АА) - Израелската војска денес го запре водоснабдувањето од израелската компанија Мекорот кон Појасот Газа, со што практично се прекинаа 70 отсто од вкупното снабдување со вода во енклавата, јавува Анадолу.

Според портпаролот на Општина Газа, Хосни Механа, исклучувањето влијае на главниот цевковод лоциран во населбата Шуџаија во источниот дел на градот Газа, каде што израелските сили спроведуваат воена операција од четвртокот.

„Причините зад прекинот се непознати, но ние се координираме со меѓународните организации за да провериме дали цевководот е оштетен поради силното израелско бомбардирање во подрачјето“, изјави Механа за Анадолу.

Додаде дека прекинот можно е да е предизвикан или од директна воена активност или намерна политичка одлука на израелските власти.

„Без оглед на причината, последиците се страшни. Доколку протокот на вода од Мекорот не продолжи наскоро, Газа ќе се соочи со целосна криза за вода“, предупреди Механа.

Појасот Газа, кој веќе страда од континуиран недостиг на чиста вода поради долгогодишната блокада, колапс на инфраструктурата и контаминација на подземните води, сега се соочува со ризик од опсежна дехидрација со понатамошно влошување на хуманитарните услови.

Над 50.000 Палестинци се убиени во Газа во воената офанзива на Израел од октомври 2023 година. Воената офанзива продолжи во март по речиси двомесечниот прекин на огнот.