САД со дополнителна воена помош од 100 милиони долари за Украина

ВАШИНГТОН (АА) - Американскиот државен секретар Eнтони Блинкен изјави дека одобрил воена помош во вредност од 100 милиони долари за Украина за да се задоволат потребите на земјата од дополнителни противоклопни системи, јавува Агенција Анадолија (АА).

„Светот е шокиран и згрозен од злосторствата извршени од руските сили во Буча и низ Украина“, се вели во изјавата на Блинкен, пофалувајќи ги украинските сили што храбро ја бранат својата земја.

Тој нагласи дека ова е шесто повлекување на оружје, опрема и залихи од инвентарот на Пентагон за Украина од август 2021 година.

Последниот пакет помош дојде по шокантните фотографии и видеа од брутални убиства на цивили во украинскиот град Буча, кој претходно беше окупиран од руските сили. Русија се повлече од областа на 30 март.

Рускиот претседател Владимир Путин и Москва се соочуваат со жестоки критики од меѓународната заедница откако Украина ги обвини руските сили за геноцид и воени злосторства во Буча.

Русија ги отфрли наводите како „напад со лажни вести“, тврдејќи дека сликите од мртвите тела и снимките на убиените цивили кои предизвикаа глобален гнев се поставени откако руските сили се повлекле од градот.

„Здружени со нашите сојузници и партнери, ќе продолжиме да обезбедуваме безбедносна помош за поддршка на одбраната на Украина, како и економска поддршка и хуманитарна помош за заедниците уништени од безмилосната бруталност на Русија“, додаде Блинкен.

Откако администрацијата на претседателот Џо Бајден ја презеде функцијата, САД обезбедија повеќе од 2,4 милијарди долари воена помош за Украина, а 1,7 милијарди долари од неа беа дадени од почетокот на руската војна против Украина кон крајот на февруари. Покрај тоа, повеќе од 30 земји се приклучија на САД за да испорачаат безбедносна помош за Украина.

Војната на Русија против Украина, која започна на 24 февруари, предизвика меѓународен гнев, при што Европската Унија, САД и Велика Британија, меѓу другите, воведоа строги финансиски санкции кон Москва.

Досега, според податоците на ОН, во Украина загинале најмалку 1.480 цивили, а 2.195 се повредени, а се стравува дека вистинската бројка е многу поголема.

Според Агенцијата за бегалци на ОН, повеќе од 4,24 милиони Украинци побегнале во други земји, со уште милиони внатрешно раселени.