Elena Trenchevska Chekovikj
12 Декември 2025•Ажурирај: 16 Декември 2025
ВАШИНГТОН (АА) - Вашингтон им нареди на 100.000 жители да се евакуираат, бидејќи катастрофалните поплави продолжуваат низ западниот дел од американската сојузна држава, со најлоши последици по должината на реките Скагит и Снохомиш, јавува Анадолу.
„Очекуваме потенцијално 100.000 жители на Вашингтон да се соочат со наредби за евакуација“, рече гувернерот Боб Фергусон, прогласувајќи вонредна состојба на ниво на целата држава.
Округот Скагит издаде наредба за евакуација од трето ниво „ЗАМИНИ ВЕДНАШ“ за сите жители во рамките на течението на реката Скагит, повикувајќи ги сите веднаш да се евакуираат на повисоки места без чекање.
Националниот центар за води пријави значителни поплави на малите потоци и умерени до големи поплавувања на реките низ Западните Каскадни Подножја до Пјуџет Саунд, со опсежни поплави во урбаните средини и мали до умерени поплавувања на реките во остатокот од западен Вашингтон.
Округот Скагит ги затвори сите небитни владини служби, вклучувајќи ги окружните и повисоките судови, поради поплавите и опасните услови. Основните служби, меѓу кои и управувањето со вонредни состојби, јавната безбедност и одржувањето на патиштата, продолжуваат да работат.
Трупите на Националната гарда на Вашингтон полнат вреќи со песок во округот Скагит помагајќи им на службите вклучени во директна помош на погодените жители.
Пожарните и спасувачките служби на Истсајд извршија спасување на околу 20 лица блокирани во своите домови или возила во последните 24 до 48 часа, објави „Сиетл тајмс“.
Целата делегација од Вашингтон во Конгресот го повика претседателот Доналд Трамп да одобри забрзано прогласување вонредна состојба поради поплавите.
Жителите се повикуваат да избегнуваат непотребни патувања, да се информираат преку официјалните канали и да ги следат советите за безбедност и евакуација.
