Рускиот претседател Путин и германскиот канцелар Шолц разговараа за војната во Украина

МОСКВА (АА) - Рускиот претседател Владимир Путин со германскиот канцелар Олаф Шолц разговараше за војната во Украина, пренесува Агенција Анадолија (АА).

Според соопштението од палатата Кремљ, Путин и Шолц во телефонскиот разговор разговарале за ситуацијата во Украина и нејзините хуманитарни аспекти.

Путин на средбата, според соопштението „ја сумира логиката и главните цели на специјалната воена операција во Украина и на мерките преземени за безбедноста на цивилите“.

Исто така, се разговараше за евакуацијата на цивилите од „Азовстал“, со учество на претставници на Обединетите нации и Меѓународната организација на Црвениот крст.

На средбата било разговарано и за преговорите меѓу Русија и Украина, при што било договорено разговорите за споменатите прашања да продолжат по различни канали.

- Германија инсистира на „дипломатско решение“

Портпаролот на германската Влада, Штефен Хебештрајт, истакна дека во 75-минутниот телефонски разговор со Путин, канцеларот Шолц разговарал за тековната војна во Украина и напорите да се стави крај на неа.

„Со оглед на сериозноста на воената ситуација и последиците од војната во Украина, особено во Мариупол, канцеларот инсистира да се постигне напредок за што е можно поскоро прогласување на прекин на огнот, подобрување на хуманитарната ситуација и изнаоѓање дипломатско решение за конфликтот“, рече Хебештрајт.

Портпаролот на германската Влада, исто така рече дека во телефонскиот разговор Шолц ги негирал обвинувањата дека нацизмот е широко распространет во Украина.

Нагласувајќи дека двајцата лидери разговарале и за глобалната ситуација со храната, која е критична поради војната што ја води Русија, Хебештрајт истакна дека Шолц потсетил дека Русија има посебна одговорност во тој аспект.