Русија: Потенцијалните договори за украинската криза треба да содржат и механизам за спречување на прекршувањата

МОСКВА (АА) - Рускиот министер за надворешни работи Сергеј Лавров изјави дека сите договори за решавање на кризата со Украина треба да содржат и механизам за спречување на прекршувањата, јавува Анадолу.

Во Москва, главниот град на Русија, Лавров се сретна со киргистанскиот министер за надворешни работи Жинбек Кулубаев, кој е во посета на Русија.

По средбата двајцата министри ја потпишаа програмата за соработка меѓу министерствата за надворешни работи на Русија и Киргистан за периодот од 2025 до 2027 година. По потпишувањето на програмата за соработка се одржа прес-конференција.

Во обраќањето Лавров рече дека пристапите на Русија и Киргистан кон глобалните и регионалните прашања се компатибилни и додаде:

„Потенциравме дека мора да се следат нормите во Повелбата на Обединетите нации (ОН). Потребно е овие принципи да се почитуваат и да се применуваат целосно, а не според ситуацијата.“

Осврнувајќи се на прашањето за безбедноста во евроазискиот регион, Лавров ја истакна потребата од зајакнување на иницијативите во борбата против тероризмот и екстремизмот.

Лавров рече дека продолжуваат да соработуваат со Киргистан на платформи, како што се Евроазиската економска заедница (ЕАЕУ), Организацијата на Договорот за колективна безбедност (ОДКБ) и Заедницата на независни држави (ЗНД).

Осврнувајќи се на кризата во Украина, Лавров го истакна следново:

„На состанокот ја потврдивме нашата решеност да ги постигнеме целите на специјалната воена операција и да ја решиме оваа криза со елиминирање на нејзините причини. Во многу земји, вклучително и Европа и САД, почна да преовладува разбирањето дека без ова е невозможно да се прекинат конфликтите. По ова прашање може да се склучат само сигурни и законски договори во кои ќе биде вклучен механизам за спречување на прекршувањата.“

Министерот за надворешни работи на Киргистан, Кулубаев, изјави дека односите со Русија се развиваат во сите правци.

Истакнувајќи дека оваа година неговата земја претседава со ОДКБ, Кулубаев нагласи дека во тој контекст ќе дадат сѐ од себе за да ги исполнат целите и задачите поставени за обезбедување мир и безбедност.