ИСТАНБУЛ (АА) – Русија планира да изгради лунарна електроенергетска станица до 2036 година, соопшти денес руската вселенска агенција Роскосмос, јавува Анадолу.

Станицата има за цел да обезбедува електрична енергија за ровери и за опсерваторија во рамки на руската програма за истражување на Месечината, како и за инфраструктурните објекти на планираната Меѓународна лунарна истражувачка станица.

„Проектот претставува важен чекор кон создавање постојана научна лунарна станица и премин од поединечни мисии кон долгорочна програма за истражување на Месечината“, се наведува во соопштението на Роскосмос.

Агенцијата соопшти дека планира и развој на вселенски летала, спроведување експериментални тестирања на Земјата, изведување тестови за летање, како и распоредување инфраструктура на површината на Месечината.

Во соопштението се додава дека во декември 2025 година Роскосмос потпишал државен договор со асоцијацијата „Лавочкин“ за реализација на работите поврзани со создавањето на руската лунарна електроенергетска станица, со рок до 2036 година.