ИСТАНБУЛ (АА) - Кремљ денес соопшти дека Русија ги поздравува напорите на Доналд Трамп за ставање крај на израелско-палестинскиот конфликт, еден ден откако американскиот претседател објави нов план за ставање крај на речиси двегодишната војна во Појасот Газа, јавува Анадолу.

„Русија секогаш ги поддржува и поздравува сите напори на Трамп што имаат цел да ја спречат трагедијата што моментно се одвива (во Газа)“, изјави портпаролот на Кремљ, Дмитриј Песков, на брифингот за медиумите, како одговор на прашањето за планот на Трамп за Газа.

„Се надеваме дека овој план ќе биде имплементиран, така што ќе помогне настаните на Блискиот Исток да се вратат во мирен тек“, рече Песков, додавајќи дека Русија одржува контакти со сите страни во конфликтот и подготвена е да овозможи мирно решавање доколку е потребно.

Тој го негираше учеството на Русија во планот, велејќи дека Москва не добила никакви сигнали од Вашингтон во овој поглед.

Вчера Трамп ги изнесе клучните точки од својот план за прекин на огнот во Газа на заедничката прес-конференција со израелскиот премиер Бенјамин Нетанјаху во Вашингтон.

Планот од 20 точки предвидува ослободување на сите израелски заробеници во замена за десетици палестински затвореници, целосно разоружување на Хамас, постепено повлекување на израелските сили и формирање технократски, аполитичен палестински комитет за управување со енклавата.