АЛ МАРЏ (АА)
- Ајдоган КАЛАБАЛИК
Репортерската екипа на Анадолу го посети либискиот регион што неодамна беше погоден од бурата „Даниел“, која зад себе остави апокалиптички последици на пошироко подрачје од Дерна до Бенгази, јавува Анадолу.
Најтешка е ситуацијата, со најмногу загинати, во градот Дерна, каде што катастрофата се влоши со уривањето на две брани, но и во соседните градови ситуацијата е многу тешка.
Дерна, Бејда, Соуса, Мерџ и Бенгази беа затрупани во кал и претрпеа големи загуби во човечки жртви и инфраструктура.
Градоначалникот на Соуса, Ваил Берик, во изјавата од 11 септември рече дека во тој град исчезнале најмалку 50 семејства.
Голема штета е предизвикана и во долината Куд меѓу градовите Бејда и Ал Марџ. Најмалку 22 жители од тамошното село Вердије исчезнале во поплавите.
Во разговор со новинарот на Анадолу, мештанинот Абдулвахид Ферџани рече дека неговиот брат со сопругата и детето исчезнале во надојдените води и дека сѐ уште нема вести за нив.
Тој раскажа дека поплавата им ги уништила куќите, автомобилите и работните места.
„Успеавме да ги пронајдеме телата на само седум од 22 лица што ги однесе буицата. Меѓу исчезнатите има и египетски и судански семејства“, рече Ферџани.
Ејмен Мухамед, друг жител на селото Вердије, рече дека само четири дена по поплавата пронашле тело на двомесечно бебе во калта натрупана под едно дрво.
„Во соседната куќа живееше едно семејство, но ни за нив нема вести“, рече тој.
Голем број куќи и земјоделски имоти и понатаму се под вода во тој либиски регион.
Кон поплавените подрачја се движат стотици камиони што пренесуваат помош собрана во кампањите организирани во главниот град Триполи и во другите градови во Западна Либија.
Бурата „Даниел“ на 10 септември го погоди истокот на Либија и предизвика поплави во градовите Бенгази, Бејда, Марџ, Соуза и Дерна.
Премиерот на Владата на национално единство, Абдулхамид Дибејбе, на 11 септември прогласи тридневна жалост во целата земја поради поплавите, а Либискиот претседателски совет побара меѓународна помош.
