Репортерите на АА гo снимија големото уништување во Појасот Газа по повлекувањето на израелската војска

ГАЗА (АА) - Израелската војска во голема мера се повлече и остави зад себе големо уништување во северозападниот дел на Појасот Газа и градот Газа, а репортерската екипа на Анадолу го посети регионот и сними снимки што сведочат за обемот на бруталното уништување на станбени населби за време на израелските напади.

На снимките се гледаат населби со стотици целосно или во голема мера уништени куќи, згради и инфраструктура.

Една таква глетка се купиштата урнатини од срушени згради во регионот Ал-Макуси околу бегалскиот камп Шати, каде што се наоѓаат и владините институции.

Во тој регион беа разрушени и џамии, како и здравствениот центар на Агенцијата на Обединетите нации за помош на палестинските бегалци (УНРВА).

Дополнителна закана од здравствена и еколошка природа претставуваат канализацијата и отпадните води кои течат низ улиците раскопани со булдожери со цел уништување на канализационата мрежа.

- Град на духови -

Локалните жители на Ал-Макуси, кој директно гледа на Медитеранот, ја опишуваат областа како град на духови по повлекувањето на израелската армија.

Зоната „Општа безбедност“, каде што живееја луѓе пред нападот и каде се наоѓаа трговски и забавни центри, е претворена во купишта урнатини.

Израелските војници испишале на хебрејски фрази и зборови на ѕидовите на урнатините, кои сведочат за бруталноста на израелските напади.

Шок и неверување е она што мештаните го доживуваат кога ќе дојдат за да ги видат своите куќи по повлекувањето на израелската војска.

Локалното население верува дека ќе бидат потребни многу години за да се отстранат урнатините и да се обноват уништените населби.

- Сцени слични на оние од камената доба -

Палестинецот Суфјан ал-Фирани, кој отишол да ја види својата куќа во областа Ал-Мухабарат во северна Газа, ја опиша ситуацијата во неговата населба како враќање во камената доба.

„Сè што ќе погледнете околу себе е уништено. Како да сме се вратиле во камена доба. Нашата зграда од шест стана е уништена. Некои од моите роднини беа убиени во нападите. Повредени се и моите деца“, рече тој.

Наведувајќи дека изгубил надеж дека ќе има знаци на живот во Газа по завршувањето на нападот, Фирани рече дека видеата најдобро ја опишуваат ситуацијата и дека можеби нема ни да се доживеат деновите кога Газа ќе биде обновена.

- „Каде се погодените воени цели?“ -

Тој додаде дека Израел целосно ја уништил инфраструктурата во Појасот Газа и дека улиците се претрупани со канализациска вода, шут и ѓубре што се закана за еколошка катастрофа.

„Уништена е и мојата куќа, куќите на моите соседи и цели населби каде што живеевме како цивили. Па каде се воените цели што беа уништени од израелската армија во овој регион?“, рече Фирани.

- Невидено уништување -

И локалниот жител Јусуф ал-Омери рече дека степенот на деструкција што Израел го предизвикал во регионот се незамисливи.

„Имавме неописливо чувство кога го видовме ова уништување кое е од невидени размери во историјата. Наидовме на сцени кои умот не можеше да ги замисли“, рече тој.

Омери истакна дека жителите од регионот ги очекуваат големи потешкотии поради уништената инфраструктура и разурнатата водоводна, електрична и санитарна мрежа.

Палестинката Есма Неим изјави дека и нејзиниот дом е уништен во израелските напади.

„Што направија со куќите тука? Срам да им е. Што сме ние виновни? Овие куќи ги изградивме со нашата пот и крв. Како ќе ги обновиме?“, рече таа.