Расистички слогани на ѕидовите на уништен универзитет во Газа откриени по повлекувањето на израелската војска

ГАЗА (АА) - По повеќе од 15 месеци разорни израелски напади врз Појасот Газа, откриени се расистички слогани испишани на ѕидовите на уништениот Универзитет во Појасот, јавува Анадолу.

Целосното повлекување на израелската Армија од таканаречениот „коридор Нецарим“ во централна Газа откри катастрофални последици врз инфраструктурата, станбените објекти и институциите во регионот.

Една од зградите на Факултетот при Универзитетот Ал-Азхар во Газа, лоцирана во областа Ал-Мограка во централниот дел на Појасот Газа, претрпела силни бомбардирања од израелската Армија. Покрај остатоците од испразнета муниција околу зградата, вниманието го привлекуваат и расистичките слогани испишани на нејзините ѕидови.

Забележано е дека израелските војници оставиле расистички слогани и пораки со говор на омраза на хебрејски јазик упатени кон Палестинците.

Еден од испишаните слогани гласи: „Тука сум за да рушам“, а во близина на него е нацртана шестокрака Давидова ѕвезда.

Снимките од теренот покажуваат целосно уништена зграда на Универзитетот, расфрлани книги и документи меѓу урнатините, како и остатоци од израелска муниција.

Во Газа договорот за прекин на огнот е на сила од 19 јануари, со кој беше запрена израелската војна што доведе до смрт на речиси 48.200 луѓе и ја остави целата енклава во урнатини.

Во ноември минатата година, Меѓународниот кривичен суд (МКС) издаде налог за апсење на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.

Истовремено, Меѓународниот суд на правдата (МСП) води постапка против Израел за геноцид во Појасот Газа.