Путин: 2025 година е „важна фаза“ во украинскиот конфликт

МОСКВА/ИСТАНБУЛ (АА) - Рускиот претседател Владимир Путин денес изјави дека 2025 година означила „важна фаза во остварувањето на целите на „специјалната воена операција“ во Украина, јавува Анадолу.

Говорејќи во седиштето на Министерството за одбрана во Москва, Путин потврди дека руската Армија ја презела и „цврсто“ ја држи стратешката иницијатива по целата линија на фронтот.

„Руските вооружени сили ослободија над 300 населени места оваа година“, рече тој.

Според Путин, и покрај западната воена помош, вклучително и снабдувањето со оружје и обуката на украинските војници, руските сили продолжуваат да напредуваат, „соборувајќи го противникот, вклучително и неговите елитни единици обучени во западните воени центри“.

Тој додаде дека Русија има капацитет да го зголеми темпото на својата офанзива во стратешки важни насоки.

Рускиот лидер, исто така, детално го опиша тековното зајакнување на војската. „Составот на морнарицата беше зајакнат оваа година со нови подморници и 19 површински бродови и пловила“, рече тој.

„Ново оружје“, додаде тој, „беше ставено во употреба и по успешните тестови на системите на нуклеарен погон 'Орешник', 'Буревестник' и 'Посејдон'.“

„Системот 'Орешник' ќе биде ставен на борбена должност до крајот на годината“, рече Путин, осврнувајќи се на балистичката ракета со среден дострел што Русија ја употреби во Украина во ноември 2024 година.

„Како одговор на украинското гранатирање, Русија планира да ја прошири безбедносната тампон-зона“, рече Путин.

Тој, исто така, ги отфрли предупредувањата на Западот за потенцијален руски напад врз Европа како „лага и бесмислица“, додавајќи: „Политичарите во Европа креваат хистерија и им ставаат страв на луѓето во главите за неизбежен судир со Русија“.

Тој рече дека стратешките нуклеарни сили на Русија служат за одвраќање на агресорот и одржување на глобалната рамнотежа на моќ.