Протест на студентите во Грција со барање за откривање на одговорните за железничката несреќа пред 2 години

АТИНА (АА) - Студентите одржаа протест во Атина, главниот град на Грција, барајќи да се идентификуваат одговорните за железничката несреќа во регионот Темпи кај грчкиот град Лариса пред две години, во која животот го загубија 57 лица, известува Анадолу.

Студентите се собраа во главниот град Атина и маршираа до Парламентот.

Демонстрантите, кои бараа да се откријат одговорните за железничката несреќа, апелираа негрижата да не се прикрива.

Тие по улиците фрлаа симболични билети на кои пишуваше „(Билет во еден правец) Нема враќање“.

Осврнувајќи се на аудиоснимката на повикот на еден од патниците во возот кој неколку минути пред несреќата се јавил во Итната помош и рекол „Немам кислород!“, студентите на протестот едногласно го скандираа слоганот „Немам кислород!“

На 28 февруари 2023 година кај грчкото место Темпи се судрија два воза што сообраќаа во спротивни насоки, по што избувна пожар. Во несреќата животите ги загубија 57 лица, главно студенти.