Продолжува беснеењето на пожарите во Русија

МОСКВА

Пожарите продолжуваат да беснеат низ Русија, а избија на 217 локации и зафатија подрачје со површина од 837.813 хектари, известува Агенција Анадолија (АА).

Руската федералната агенција за шуми соопшти дека во тек се акциите за гасење на пожарите што и понатаму се активни на истокот од земјата.

Во соопштението се вели дека вчера под контрола се ставени 36 опожарени локации.

„Заклучно со 1 август продолжуваат пожарите на вкупно 217 локации со површина од 837.813 хектари. Во Јакутија активни се 115, а во Иркуцк 51 пожар“, се вели во соопштението.

Во продолжение се наведува дека во акциите за гаснење на пожарите учествувале околу 5.000 луѓе и неколку стотици возила.

Пожарите што во јули избија во Сибир, во пепел претворија територија со површина од 1,3 милиони хектари, а тамошните власти прогласија вонредна состојба.