Природниот гас од Источниот Медитеран може да замени најмногу 20 проценти од увозот на руски гас во ЕУ

ИЗМИР (АА) - Ресурсите на природен гас во Источниот Медитеран би можеле да заменат најмногу 20 проценти од увозот на рускиот гас во Европската Унија, доколку објектите на течниот природен гас (ТПГ) во Египет работат со полн капацитет и се реализира предложениот гасовод, истакна Сохбет Карбуз, директорот на Одделот за јаглеводороди при Медитеранската опсерваторија за енергетика (OME).

Карбуз во ексклузивно интервју за Агенција Анадолија рече дека единствените ресурси на гас во Источниот Медитеран, што се оперативни за извоз, се преку два објекти на ТПГ, лоцирани во Египет.

Овие објекти минатата година го срушија десетгодишниот извозен рекорд со кумулативен капацитет од 19 милијарди кубни метри.

Ако се внесе израелскиот гас во наредните три до пет години, Карбус рече дека Египет би можел да го достигне својот целосен извозен капацитет, но тоа ќе покрие само 12 отсто од побарувачката на ЕУ.

Понатаму, тој истакна дека само дополнителни 10 милијарди кубни метри можат да бидат извезени, според најдоброто сценарио, од Источниот Медитеран во наредните пет до 10 години.

Со целта на ЕУ да намалат две третини од нејзините 155 милијарди кубни метри годишен увоз на руски гас до крајот на годината и да го намали целиот до 2027 година, тој рече дека ќе биде тешко да се набави заменски гас.

„Овогодинешниот увоз на течен природен гас од Египет се предвидува да остане ист, па дури и ако сите овие количини ТПГ се испратат во Европа, оваа количина е само 6 проценти од вкупниот увоз на гас на ЕУ од Русија“, предупреди тој.

Под претпоставка дека ќе се реализира предложениот гасовод Турција - Израел, тој рече дека може да ѝ помогне на ЕУ да замени само 20 отсто од увозот на руски гас.

Осврнувајќи се на изводливоста на доставување на израелските ресурси на гас во Европа, Карбуз рече дека одлуката за формата на транспорт што ќе се користи ќе биде одлучувачки фактор, за кој ќе одлучуваат партнерите и операторите од гасното поле Левијатан, а не владата или политичарите.

Тој нагласи дека најважната причина за повлекувањето на американската поддршка од проектот за гасоводот „ИстМед“ е тешкотијата за постигнување договор помеѓу продавачите и купувачите.

Грција, Израел и администрацијата на кипарските Грци потпишаа договор во 2020 година за изградба на гасовод за природен гас, долг 1.900 километри во Источниот Медитеран, познат како проект за гасовод „ИстМед“, кој ќе ги поврзува Израел, администрацијата на кипарските Грци, Крит, Грција и евентуално Италија.

САД на 11 јануари формално ја повлекоа својата поддршка за предложениот план. Американската амбасада во Атина соопшти дека администрацијата на Бајден го „префрла нашиот фокус на интерконекторите за електрична енергија кои можат да поддржуваат и гас и обновливи извори на енергија“.

„Гасоводот Турција - Израел повторно стана актуелно прашање со чекорите преземени за нормализирање на односите меѓу двете земји. Сепак, при оценувањето на неодамнешниот оптимизам во односите треба да се земат предвид и комерцијалните и политичките аспекти“, рече Карбуз.

Тој забележа дека нема комерцијален проблем за купувачите со оглед на тоа дека Турција е еден од најголемите пазари за гас во Европа, иако предупреди дека кипарското прашање треба да се реши ако се гради гасовод од полето Левијатан до Турција.

„Доколку се расчистат овие комерцијални и политички пречки, тогаш може да започне инвестицискиот процес за развој на полето Левијатан во втората фаза. Во секој случај би било нереално да се даде рок пред 2025 година за реализација на овој проект“, рече тој.

Првиот состанок на високо ниво помеѓу Израел и Турција во десет години се реализираше во Анкара на 9 март. За време на состанокот на претседателот Исак Херцог и турскиот претседател Реџеп Таип Ердоган беше нагласена целта за заживување на билатералните односи засновани на заеднички интереси и ја искористија можноста да разговараат за унапредување на заедничката соработка.