Претставничкиот дом на САД усвои предлог-закон за ограничување на продажбата на оружје за Саудиска Арабија

ВАШИНГТОН (АА) - Претставничкиот дом на Соединетите Американски Држави (САД) го усвои Предлог-законот со кој се ограничува продажбата на оружје на Саудиска Арабија поради убиството на новинарот на „Вашингтон пост“ (Washington Post), Џамал Кашоги, јавува Агенција Анадолија (АА).

Законодавците го усвоија Предлог-законот со двопартиско мнозинство од 350:71 глас.

Со Предлог-законот, исто така, се бараат разни извештаи и акции во врска со смртта на саудискиот новинар.

Нејасно е дали Сенатот ќе ја прифати мерката.

„Бруталното убиство на Џамал Кашоги нема да се заборави и нема да помине без одговор. Претставничкиот дом јасно се изјасни: Саудиска Арабија мора да биде повикана на одговорност“, истакна претставникот на демократите, Гери Коноли, преку Твитер.

Кашоги беше брутално убиен, а телото најверојатно исечено на парчиња откако беше намамен од саудиските власти во нивниот Конзулат во Истанбул, Турција, во октомври 2018 година. Додека Ријад првично негираше каква било улога во неговата смрт, подоцна се обиде да ја стави вината на, како што рече, недобро изведена операција на испитување.

Тоа објаснување е нашироко одбиено.