Handan Kazancı
21 Ноември 2022•Ажурирај: 22 Ноември 2022
ИСТАНБУЛ (АА) - Актуелниот претседател на Казахстан, Касим-Жомарт Токаев, победи на предвремените претседателски избори што се одржаа вчера, со над 81 отсто од гласовите, според денешните прелиминарни резултати, пренесува Агенција Анадолија (АА).
Казахстанската новинска агенција „Казинформ“, повикувајќи се на Централната изборна комисија, објави дека Токаев освоил над 6,4 милиони гласови, обезбедувајќи лесна победа против пет помалку познати кандидати.
Гласањето заврши во 22 часот според локално време, при што се наведува дека одѕивот на гласачите до крајот на денот изнесувал 69 отсто, односно гласале речиси 8,3 милиони од околу 12 милиони гласачи со право на глас.
Повикот за предвремени избори беше упатен од Токаев кон крајот на септември со уредба дека гласачките места ќе започнат „изборен циклус што ќе доведе до радикално ресетирање на целиот политички систем“.
Најавата дојде откако Токаев го одобри уставниот амандман за зголемување на претседателскиот мандат од пет на седум години, додека на идните претседатели ќе им се забрани втор мандат.
Друг потег беше промената на името на главниот град назад во Астана, откако беше сменет во Нур Султан во 2019 година во знак на почит кон претседателот во заминување Нурсултан Назарбаев. Токаев ја презеде функцијата претседател во март 2019 година, наследувајќи го Назарбаев, кој владееше со централноазиската држава богата со нафта три децении.
