Прелиминарни резултати од општите избори во Израел: Блокот на Нетанјаху во водство

КУДС (АА) - Според прелиминарните резултати од парламентарните избори во Израел, во водство е опозицискиот блок предводен од поранешниот премиер Бенјамин Нетанјаху, кој освои 67 пратеници во израелскиот Парламент (Кнесет), кој има вкупно 120 пратенички места, пренесува Агенција Анадолија (АА).

Весникот „Хаарец“ наведува дека се преброени 71,3 отсто од гласачките ливчиња и дека десничарската партија Ликуд на Нетанјаху освоила 32 места во Кнесетот. Нејзините сојузници, екстремно десничарската Верска ционистичка партија, освои 14 места, партијата „Шас“ 12 места, а Еврејската партија „Обединета Тора“, 9 места.

Според овие прелиминарни резултати, партијата „Јеш Атид“ на актуелниот премиер Јаир Лапид ќе освои 23 места, Партијата за национално единство на министерот за одбрана, Бени Ганц, 12 места и партијата „Израел беитену“ на министерот за финансии, Авигдор Либерман, ќе освои 5 места.

Според прелиминарните резултати, Обединетата Арапска листа предводена од Мансур Абас освои 5 места во Кнесетот, додека Демократскиот фронт за мир и еднаквост (ХАДАШ) на Ајман Одех и Ахмад Тиби освои 4 места.

Резултатите му даваат на Нетанјаху мнозинство во Кнесетот за да формира нова израелска влада.

Изборите во вторникот беа петти за помалку од четири години и забележаа најголема излезност на гласачите во последните 20 години.