Преживеан од Крајстчрч се соочи со терористот Терент: „Ти си кукавица и убиец кој ќе страда засекогаш“

КУАЛА ЛУМПУР (АА) - Во Нов Зеланд денеска продолжи завршното рочиште и изрекување на пресудата на извршителот на терористичкиот напад, Брентон Терент, кој во две џамии во Крајстчрч уби 51 верник. На третиот ден од рочиштето во судницата беше присутен Турчинот Мустафа Бозташ, кој беше ранет во терористичкиот напад, а денеска имаше можност да се соочи со терористот Терент, јавува Агенција Анадолија (AA).

„Кога ќе останеш сам нема да живееш на друго место, освен во минатото“, рече Бозташ, обраќајќи му се на Терент.

Тој рече дека терористот Терент не е ништо друго туку мртовец кој дише.

„Ти си една кукавица и убиец што ќе страда засекогаш“, додаде Бозташ и продолжи:

„Ти никогаш нема да можеш да го заборавиш минатото од две причини. Првата е поради тоа што немаш иднина, а втората е што не си човек. Не си ниту животно, бидејќи животните се суштества кои му користат на човештвото. Ќе бидеш запаметен, но само како страшлив убиец. Ти си глупав за да сфатиш дека сите луѓе, освен по бојата на кожата, се исти.“

Бозташ во текот на напад на една од џамиите беше ранет во ногата, по што успеал да го искрши прозорецот од џамијата и да излезе, така избегнувајќи сигурна смрт за само неколку секунди.

Терористот Терент на 15 март 2019 година, за време на петочната молитва (џума намаз), упадна во џамиите „Нур“ и „Линвуд“ во градот Крајстчрч и уби најмалку 51 муслиман, собрани на неделната молитва.