ЊУЈОРК/ИСТАНБУЛ (АА) – Стотици православни Евреи вчера одржаа протест во Њујорк против планираното учество на израелскиот премиер Бенјамин Нетанјаху на состаноците на Генералното собрание на Обединетите нации следната недела, јавува Анадолу.

Организирани преку платформата „Israel versus Judaism“ (Израел против јудаизмот), демонстрантите се собраа пред зградата на израелскиот Конзулат во Менхетн.

Тие пристигнаа со училишни автобуси и носеа транспаренти со натписи: „Нетанјаху и Бен Гвир – непријатели број еден на еврејскиот народ“, „Антиционизмот не е антисемитизам“ и „Престанете да ги терате Евреите во ционистичката армија“.

Зад платформата од која се одржуваа говори имаше голем знак на јазикот јидиш, што привлече внимание со зборовите: „Нетанјаху: не зборуваш во наше име“.

Рабинот Давид Фелдман, еден од демонстрантите, за Анадолу изјави дека посетата на Нетанјаху на ОН „ќе го наведе светот да помисли дека тој ги претставува сите Евреи и дека неговите постапки се оправдани со јудаизмот“.

„Сè што претставуваат Израел и Бенјамин Нетанјаху е во целосна спротивност со јудаизмот и е вистински извор на срам за нашиот народ“, рече тој.

Повикувајќи се на Тората, Фелдман истакна дека вистинскиот јудаизам налага спротивставување на државата Израел.

„Ни е забрането да водиме војни или да напаѓаме други народи. Враќањето во светата земја и масовната миграција се забранети“, додаде тој.

Говорејќи за случувањата во Газа, Фелдман ги нарече „неприфатливи“ и нагласи дека е длабоко тажно да се сведочи на убиства, одземање земја и угнетување на целиот палестински народ.

Тој истакна дека не само во Њујорк, туку и низ целиот свет, многу Евреи се спротивставуваат на политиките на Израел.

„Да биде јасно, ние не се спротивставуваме само на радикалниот Нетанјаху, туку на сите форми на ционизам – умерен или екстремен“, рече Фелдман.

Тој додаде дека протестите ќе продолжат кога Нетанјаху ќе пристигне во Њујорк.

Демонстрантите подоцна маршираа кон зградата на Обединетите нации, со што официјално ги завршија демонстрациите.