Поранешниот американски претседател Трамп е „безбеден“ по истрелите од огнено оружје во негова близина на Флорида

ВАШИНГТОН/ИСТАНБУЛ (АА) - Поранешниот американски претседател Доналд Трамп е „безбеден“ откако се слушнати истрели пред местото каде што се наоѓал во Флорида, изјави портпаролот на неговата претседателска кампања, јавува Анадолу.

„Претседателот Трамп е безбеден по истрелите во негова близина. Нема повеќе детали во овој момент“, рече директорот за комуникации на кампањата на Трамп, Стивен Чеунг.

Изјавата дојде веднаш по наводите дека две лица размениле оган пред неговиот голф клуб во Флорида.

Тајната служба, во соработка со канцеларијата на шерифот на округот Палм Бич, истражува заштитен инцидент што се случил непосредно пред 14 часот по локално време, истакна на платформата Х началникот за комуникации на американската тајна служба Ентони Гуглиелми.

Тој додаде дека канцеларијата на шерифот на округот Палм Бич наскоро ќе има повеќе детали.

- Бајден и Харис информирани за безбедносниот инцидент -

Претседателот Џо Бајден и потпретседателката Камала Харис се информирани за безбедносниот инцидент на Меѓународниот терен за голф на Трамп, каде што поранешниот претседател Трамп играл голф, соопшти Белата куќа.

„Им олесна кога дознаа дека тој е безбеден. Нивниот тим редовно ќе ги информира“, се додава од Белата куќа.

Харис истакна дека била информирана за извештаите за истрели од огнено оружје во близина на поранешниот претседател Трамп и неговиот имот на Флорида.

„Мило ми е што е безбеден. На насилството му нема место во Америка“, порача таа преку X.

Синот на Трамп, Доналд Трамп Џуниор, рече дека автоматско оружје АК-47 било откриено во грмушките, повикувајќи се на локалната полиција.

„Кампањата на Трамп објави соопштение потврдувајќи дека поранешниот претседател Трамп е безбеден. Наводно, приведен е еден осомничен“, објави тој на X.

Американскиот сенатор Линдзи Греам рече дека штотуку разговарал со Трамп.

„Тој е еден од најсилните луѓе што некогаш сум ги познавал. Тој е во добро расположение и е порешителен од кога било да ја спаси нашата земја“, истакна Греам на X.

На 13 јули Трамп беше повреден во обид за атентат во Пенсилванија.

Томас Метју Крукс, 20-годишен вооружен напаѓач, отвори оган врз Трамп за време на предизборниот митинг во округот Батлер, ранувајќи го во неговото десно уво. Извештаите потоа укажаа дека Трамп случајно го свртел своето тело во мигот кога бил истрелан куршумот, избегнувајќи многу посериозна повреда.

Вооружениот напаѓач уби еден од присутните на митингот, а тешко повреди уште двајца. Откако отвори оган, Крукс беше убиен на местото на настанот од агент на Тајната служба.