ВАШИНГТОН (АА) - Американскиот советник за национална безбедност, Џејк Саливан, истакна дека загриженоста за безбедноста што ја изразија Турција и претседателот Реџеп Таип Ердоган во врска со членството на Шведска и Финска во НАТО може да се реши, пренесува Агенција Анадолија (АА).

Саливан одговараше на новинарски прашања во претседателскиот авион за време на посетата на Бајден на Јужна Кореја и Јапонија.

Посочувајќи дека американскиот претседател Џо Бајден денеска разговарал со лидерите на Шведска и Финска, Саливан истакна дека САД целосно го поддржуваат процесот за членство во НАТО на овие две земји.

Во врска со ставот на Турција за процесот за членство во НАТО на двете земји, Саливан рече: „Ние веруваме дека за загриженоста на Турција за членството на Финска и Шведска во НАТО, изразена од претседателот Ердоган и други официјални лица, може да се разговара и да се реши.“

Потсетувајќи дека вчера се сретнал со неговиот колега Ибрахим Калин и дека американскиот државен секретар Ентони Блинкен разговарал со турскиот министер за надворешни работи, Мевлут Чавушоглу, Саливан рече: „Денеска и финскиот претседател и шведскиот премиер рекоа дека имаат намера директно да се сретнат со претседателот Ердоган и неговиот тим.“

Меѓу другото, Саливан нагласи дека САД немаат намера директно да разговараат со претседателот Ердоган за решавање на проблемот и дека ова прашање е всушност прашање што треба да се реши меѓу Турција и Финска и Турција и Шведска.