Поради тридневен штрајк, „Еуровингс“ откажа повеќе од 170 летови

ФРАНКФУРТ

„Еуровингс“, нискобуџетниот превозник на „Луфтханза“, откажа повеќе од 170 летови закажани за понеделник, вторник и среда поради штрајкот на кабинскиот персонал во сестринската компанија „Џерманвингс“, јавува Агенција Анадолија (АА).

Откажувањата се однесуваат најмногу на летовите во внатрешноста на Германија од аеродромите кои ги вклучуваат Келн-Бон, Хамбург, Минхен, Штутгарт и Дизелдорф.

Информациите за откажувањата се споделени на интернет-страницата на „Еуровингс“.

„Еуровингс“ соопшти дека работи на намалување на последиците за патниците и дека според распоредот, ќе бидат оперативни повеќе од 1.000 летови.

Унијата на стјуарди и стјуардеси УФО (UFO) повика на штрајк поради спорот околу можноста за хонорарна работа во „Џерманвингс“.