Jo Harper
29 Март 2024•Ажурирај: 30 Март 2024
ВАРШАВА (АА) - Полскиот премиер Доналд Туск изјави дека светот мора да го прифати фактот дека дојде нова ера на војна, опишувајќи ја како најкритичен момент од крајот на Втората светска војна, во која следните две години ќе бидат одлучувачки за сѐ, пренесува Анадолу.
„Живееме во најкритичното време од крајот на Втората светска војна. Следните две години ќе бидат одлучувачки за сè“, рече Туск во интервју за пет европски весници, меѓу кои и полската Газета Виборца, објавено денес.
„Не сакам никого да плашам, но војната повеќе не е нешто од минатото. Таа е реална (и) всушност започна пред повеќе од две години. Тоа што во моментов е највознемирувачко е фактот дека буквално секое сценарио е можно“, рече Туск.
„Разбирам дека ќе звучи поразително, особено за помладата генерација, но мора психички да се подготвиме за доаѓањето на новата ера. Предвоена ера. Не претерувам.“
„Наша главна задача треба да биде да ја заштитиме Украина од руската инвазија и да ја одржиме Украина како независна и интегрална држава (...) денес нејзината (Украина) ситуација е многу потешка отколку пред една година, но и многу подобра отколку на почетокот на војната,“ рече Туск.
Тој нагласи: „Потребен ни е силен сојуз со САД и во исто време мора да бидеме независни и самодоволни во однос на одбраната. Наша задача е да негуваме трансатлантски врски, без оглед кој ќе биде американски претседател.“
На прашањето за споровите на полската земјоделска и трговска политика со Украина, Туск одговори: „Веројатно јас сум најпроукраинскиот политичар во Европа, но одговорен сум пред моите граѓани. Како премиер на Полска одговорен сум за заштитата на фундаменталните интереси на земјата.“
„Полјаците плаќаат висока цена. Никој не може да се натпреварува со Полска кога е во прашање поддршката за Украина (...) Сакаме да ѝ помогнеме на Украина колку што можеме. Но на последниот самит на Европскиот совет нагласив дека идејата за слободна трговија со Украина треба да се ремоделира. Сакам фер договор со Украина за ова прашање“, нагласи полскиот премиер.
Во средата ЕУ-амбасадорите постигнаа договор за продолжување на бесцаринската трговија со Украина. Пченицата и јачменот, сепак, беа исклучени од листата на производи што подлежат на квантитативните ограничувања.
