Повредени 43 Палестинци во интервенција на израелските сили на протестите во Западниот Брег

РАМАЛА

Најмалку 43 Палестинци се повредени во текот на интервенцијата на израелските безбедносни сили на мирните протести што на окупираниот Западен Брег беа организирани синоќа во знак на противење против изградбата на илегалните еврејски населби, известува Агенција Анадолија (АА).

Протестите се организирани во повеќе градови на Западниот Брег, а најмасовни беа во Наблус и Хеброн, каде што израелските сили користеа оружје, солзавец и димни бомби за да ги растераат демонстрантите.

Меѓу повредените имаше и неколку новинари и медицински персонал.

Директорот на Итната помош во Наблус, Ахмед Џибрил, за АА изјави дека две момчиња се ранети од огнено оружје, како и дека со пластична муниција се повредени 14 демонстранти. Џибрил додаде дека четворица новинари се претепани, а десетици демонстранти побарале медицинска помош поради вдишување солзавец и дим.

Палестинците секој петок во градовите на окупираниот Западен Брег одржуваат протести со барање за ставање крај на израелската окупација и на изградбата на нелегалните еврејски населби на палестинската земја.