Servet Günerigök
15 Февруари 2022•Ажурирај: 16 Февруари 2022
ВАШИНГТОН (АА) - Соединетите Американски Држави (САД) соопштија дека Русија „додала воен капацитет“ долж границата со Украина, но не веруваат дека рускиот претседател Владимир Путин донел конечна одлука за инвазија на поранешната советска република, јавува Агенција Анадолија (АА).
Говорејќи на прес-конференција, портпаролот на Пентагон, Џон Кирби, рече дека Путин го зголемил военото присуство на Русија во близина на Украина и во Белорусија во последните 24 часа.
„Се одвиваат вежби на некои од неговите единици на теренот таму, на југ, како и на поморските единици во Црното Море. Така, тој продолжува да ја зголемува својата подготвеност, продолжува да си дава повеќе опции“, рече Кирби.
Тој сепак се воздржа од навлегување во конкретното движење на руските војници и додаде дека Пентагон не верува дека некоја конечна одлука е донесена од страна на рускиот претседател.
Некои западни медиуми тврдеа дека Русија би можела да изврши напад врз Украина утре.
Москва неодамна распореди повеќе од 100.000 војници во близина на границата со Украина, предизвикувајќи стравувања дека Кремљ би можел да планира нова воена офанзива против својот поранешен советски сосед.
Русија негира дека се подготвува за инвазија и ги обвини западните земји дека ја поткопуваат нејзината безбедност преку проширувањето на НАТО кон нејзините граници.
Кремљ, исто така, издаде список со безбедносни барања до Западот, меѓу кои се и гаранциите дека Украина и Грузија нема да се приклучат кон НАТО.
