Палестинците се борат со дождот и студеното време во Хан Јунис, во Појасот Газа

ХАН ЈУНИС (АА) - Како што се приближува зимата, животот станува се поголем предизвик за раселените Палестинци кои живеат во импровизирани шатори во Хан Јунис, во јужниот дел на Појасот Газа, известува Анадолу.

Во областа Ал-Маваси, западно од Хан Јунис, Палестинците кои живеат во шатори се борат со силните ветрови и дождот што ја зафати областа.

Ал-Маваси беше меѓу целите на израелските бомбардирања во кои досега се убиени голем број цивили.

Еден од најразорните инциденти се случи на 10 септември, кога израелските сили бомбардираа камп за раселени лица во областа Ал-Маваси убивајќи 40 Палестинци и ранувајќи 60, објавија официјалните медицински служби.

И покрај резолуцијата на Советот за безбедност на Обединетите нации со која се бара итен прекин на огнот, Израел ја продолжува својата брутална офанзива со неселективно бомбардирање на цивилни населби, училишта, верски објекти и болници во Појасот Газа од октомври минатата година.

Според локалните здравствени власти, оттогаш во израелските напади се убиени речиси 41.400 Палестинци, главно жени и деца, а повеќе од 95.000 се повредени.

Израелските напади врз палестинската енклава го принудија населението на Појасот Газа внатрешно да се расели, предизвикувајќи акутен недостиг на храна, чиста вода и лекови и притоа разорувајќи ја и уништувајќи ја инфраструктурата на енклавата.

Израел се соочува со обвиненија за геноцид пред Меѓународниот суд на правдата за неговите постапки во Газа.