РАМАЛА (АА) - Палестински претставник од Министерството за економија изјави дека Туркије има најголем удел во вкупниот годишен извоз на палестинскиот пазар, јавува Анадолу.

Рашад Јусеф, директор за политики и планирање во палестинското Министерство за национална економија, за Анадолу рече дека трговијата со Туркије значително пораснала во последните пет години во однос на извозот и увозот.

Тој истакна дека во текот на последните пет години Туркије станала втор извор на стоки на палестинскиот пазар по Израел.

„Ако го исклучиме Израел, Туркије е најголем извор на стоки и производи на палестинскиот пазар“, рече палестинскиот претставник.

Тој истакна дека палестинско-турскиот обем на трговска размена во 2022 година надмина 900 милиони долари, што претставува зголемување од 12 отсто во однос на нивото во 2021 година.

„Туркије не го презема само водството во уделот на извозот за Палестина, туку Анкара придонесе за зголемување на уделот на палестинските производи на турскиот пазар“, рече Јусеф.

Тој истакна дека главниот турски извоз во Палестина се состои од железо, дрво, растително масло, тутун, прехранбени производи и производи од индустријата за пластика.

- Гранични премини -

Во однос на прашањето за граничните премини, палестинскиот претставник истакна дека нема палестинска контрола врз нив, нагласувајќи дека сета увезена стока во Палестина мора да помине низ Израел.

„Израел има целосна контрола врз граничните премини бидејќи палестинскиот увоз пристигнува во (израелските) пристаништа Хаифа или Ашдод, а потоа стоката се транспортира до палестинските територии со камиони“, рече Јусеф.

Тој додаде дека Туркије е мултииндустриска земја што на Палестина ѝ е потребно, но „израелските ограничувања и економските договори ги ограничуваат партнерствата во трговската размена меѓу Палестина и Туркије“.