Палестинската Црвена полумесечина соопшти дека во Појасот Газа влегле уште 53 камиони со помош

АНКАРА (АА) - Палестинската Црвена полумесечина доцна синоќа објави дека дополнителни 53 камиони со помош влегле во Појасот Газа преку граничниот премин со Египет, Рафа, јавува Анадолу.

Хуманитарната организација соопшти дека камионите превезувале средства за основни потреби како лекови и медицински материјали, прехрамбени артикли и вода.

Се додава дека овие залихи помагаат да се задоволат итните потреби на погодените жители во Газа.

Од првото влегување на камиони со хуманитарна помош во Појасот Газа на 21 октомври, дозволен е влез на вкупно 904 камиони со помош. Меѓутоа, бројката е далеку од задоволување на потребите на луѓето погодени од израелските напади врз енклавата.

Израелската војска продолжува да забранува влез на гориво во Појасот Газа.

Израел започна немилосрдни воздушни и копнени напади врз Појасот Газа по прекуграничниот напад на палестинската група Хамас на 7 октомври.

Во израелските напади досега загинаа најмалку 11.078 Палестинци, меѓу кои 4.506 деца и 3.027 жени. Според официјалните податоци, бројот на загинати во Израел е речиси 1.200.