Осумдесет луѓе загинаа во обилните дождови во Колумбија

БОГОТА (АА) – Во Колумбија од почетокот на март 80 лица загинаа, а 10 исчезнаа во обилните дождови и свлечишта кои продолжуваат низ целата земја, пренесува Агенција Анадолија (АА).

Според последниот извештај на Националната единица за управување со ризици од катастрофи (UNGRD), регионите Кундинамарка, Антиокија и Сантандер се најмногу погодени од обилни дождови и лизгање на земјиштето.

Како последица на силните поплави и свлечишта, од март досега животот го загубија 80 лица, а 10 се водат како исчезнати.

Во земјата вкупно 418 места се сериозно оштетени од обилните дождови.

Од врнежите и одроните во овие региони оштетени се 16.295 куќи.

Според извештајот, од катастрофата оштетени се 730 автопати, 72 моста, 37 пешачки премини, 90 аквадукти, 37 канализации, 108 образовни институции и 7 здравствени домови.

Во Колумбија секоја година, поплавите и лизгањето на земјиштето како последица на обилните дождови предизвикуваат многу жртви и сериозни штети.