ОН ја формираа комисијата за истрага за наводните руски злосторства во Украина

ЖЕНЕВА (АА) - Обединетите нации (ОН) определија три члена на Меѓународната независна истражна комисија која ќе ги истражува наводните злосторства на Русија во Украина, пренесува Агенција Анадолија (АА).

Федерико Вилјегас, претседател на Советот за човекови права на ОН, како шеф на Комисијата го назначи Ерик Мосе, норвешки адвокат кој работеше како поранешен судија во Европскиот суд за човекови права и беше претседател на Меѓународниот кривичен суд основан за Руанда.

Јасминка Џумхур, експерт за човекови права и меѓународни односи од Босна и Херцеговина, и Колумбиецот Пабло де Греиф, поранешен специјален известувач на ОН, беа назначени за други двајца членови на тричлената Меѓународна истражна комисија.

Во писмената изјава на Советот за човекови права на ОН се нагласува: „Истражната комисија доби задача ‘да ги истражи кршењата и злоупотребите на човековите права, кршењето на меѓународното хуманитарно право и злосторства во контекст на агресијата на Руската Федерација против Украина.‘“

На специјалната седница на Советот за човекови права во Украина, одржана на 4 март, беше усвоена Нацрт-резолуцијата со која се осудуваат сите наводни прекршувања на човековите права и меѓународното право за време на руските напади врз Украина и се предвидува формирање меѓународна истражна комисија која нив ќе ги истражи.

Нацрт-резолуцијата, во која меѓу повеќето презентери се наоѓаше и Турција, беше прифатена од 47-члениот Совет со 32 гласа „за“ и 2 гласа „против“. Тринаесет земји беа воздржани на гласањето.

Комисијата, чиј мандат е одреден на една година, извештајот што ќе го подготви врз основа на наодите ќе го презентира до Советот за човекови права на ОН.