ХАМИЛТОН (АА) – Обединетите нации (ОН) денес предупредија за нов бран масовно раселување и влошување на хуманитарните услови во Појасот Газа, поради интензивирањето на израелските напади, јавува Анадолу.

„Нашите колеги од терен предупредуваат дека ескалирачките напади во градот Газа имаат ужасни хуманитарни последици за луѓето што живеат на овие места, од кои многумина претходно беа раселени од северна Газа“, изјави портпаролот Стефан Дужарик на прес-конференција.

Тој нагласи дека „многу домаќинства не се во можност да се преселат поради високите трошоци и немањето безбедно место за преселба, а особено се погодени постарите лица и лицата со попреченост“.

Повикувајќи се на хуманитарните партнери на ОН, Дужарик рече дека од 14 до 31 август „евидентирани се повеќе од 82.000 нови раселувања, вклучувајќи речиси 30.000 преселби од север кон југ“.

„Нашите партнери ги опишуваат условите на теренот како жалосни, со остатоци и отпад што се акумулираат во близина или во самите пренатрупани живеалишта“, рече тој, додавајќи дека зголемувањето на температурите ги зголемило „нехигиенските услови, што довело до голема наезда од глодари и инсекти“.

„Како резултат на тоа, постојат зголемени здравствени ризици, а децата развиваат осипи на кожата“, рече тој.

Повикувајќи се на Канцеларијата за координација на хуманитарните прашања (OCHA), Дужарик извести дека „од 16 мисии координирани со израелските власти вчера, пет се соочиле со екстремно долги одложувања пред да добијат зелено светло од израелските власти за движење, вклучително и напорите за собирање залихи од премините“.

И покрај израелските ограничувања, тој истакна дека тимовите на ОН „беа во можност да земат од хуманитарната помош, меѓу која и медицински материјали, како и гориво од преминот Керем Шалом“.

Сепак, „две од попречените мисии, кои имаа за цел да земат помош во храна од премините, беа само делумно реализирани. Осум други хуманитарни движења беа овозможени вчера, додека три мораа да бидат откажани од организаторите“.

Израел започна брутална воена офанзива врз Појасот Газа, убивајќи повеќе од 63.700 Палестинци во Газа од крајот на 2023 година. Воената кампања ја опустоши енклавата, која се соочува со глад.

Минатиот ноември, Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата поради своите воени дејствија во енклавата.