Betül Yürük
19 Мај 2022•Ажурирај: 23 Мај 2022
ЊУЈОРК (АА) - Светската програма за храна на Обединетите нации (WFP) соопшти дека неможноста да се извезува жито складирано во украинските пристаништа е „војна против глобалната безбедност на храната“ и предупреди дека може да дојде до „глад и присилна масовна миграција“ доколку пристаништата не се отворат, пренесува Агенција Анадолија (АА).
Директорот на ВФП, Дејвид Бисли, на состанокот на министерско ниво одржан во седиштето на ОН, рече: „Претседателе Путин, апелирам до тебе, ако имаш срце, те молам, отвори ги овие пристаништа.“
Наведувајќи дека неможноста да се извезат житариците складирани во украинските пристаништа е „војна против глобалната безбедност на храната“, Бисли предупреди дека ако пристаништата не се отворат, може да дојде до „глад и присилна масовна миграција“.
Генералниот секретар на ОН, Антонио Гутереш, рече дека глобалното ниво на глад се движи кон нов рекорд, а оние кои се соочуваат со сериозна несигурност на храна, се зголемиле од 135 милиони на 276 милиони во последните две години.
Истакнувајќи дека повеќе од 500.000 луѓе живеат во услови на глад, Гутереш додаде дека оваа бројка е зголемена за 500 отсто од 2016 година.
Тој, потсетувајќи дека Украина и Русија задоволуваат речиси една третина од потребите за пченица и јачмен во светот и половина од потребите од сончогледово масло, рече дека се во интензивни контакти со Русија, Украина, Турција, САД и Европската Унија, со цел повторно да се реализира извозот на житото од украинските пристаништа.
