ОН: Гласање за Резолуцијата за прогласување на 11 јули за Меѓународен ден на сеќавање на геноцидот во Сребреница во мај

ЊУЈОРК (АА) - Генералното собрание на Обединетите нации (ОН) кон средината на мај ќе гласа за Резолуцијата за прогласување на 11 јули за Меѓународен ден на сеќавање на геноцидот во Сребреница, јавува Анадолу.

На оваа тема ќе се разговара денес на вонредната седница на Советот за безбедност на ОН што Русија ја свика на иницијатива на Србите од Босна и Херцеговина.

Дипломатски извори во Њујорк потврдија дека не се сомневаат во прифаќањето на Резолуцијата. Прашање е само колку земји ќе се воздржат.

Против Резолуцијата се очекува да гласаат десетина земји во Генералното собрание на ОН од 193 члена, но постои можност неколку десетици земји да се воздржат од гласање.

За Резолуцијата требаше да се гласа оваа недела, но наводно има компликации со агендата, а Србија тоа го претставува како успех на своето лобирање.

Србија, со помош на Русија, во седиштето на ОН започна жестоко да лобира против Резолуцијата, која ја опишува како „напад врз целиот српски народ“, додека некои политичари од босанскохерцеговските ентитети на РС дури се закануваат со „отцепување и разграничување“, иако во текстот на Резолуцијата не се споменува Србија или целиот српски народ.

Меѓу другото, во Нацрт-резолуцијата се осудуваат негирањето на геноцидот и глорификацијата на осудените за воени злосторства. Тоа беше предложено од земји што имаат тешко историско искуство со него - Германија и Руанда, со учество на други земји.

Во Сребреница, која тогаш беше под заштита на ОН, војниците на босанските Срби убија најмалку 8.000 Бошњаци во 1995 година. Меѓународниот кривичен суд за поранешна Југославија го дефинираше тоа злосторство како геноцид, а повеќе од 50 лица беа осудени таму и пред судовите во БиХ.

Масакрот во Сребреница беше прогласен за геноцид и од Меѓународниот суд на правдата во Хаг (МСП).

На оваа тема ќе се дискутира денес на вонредната седница на Советот за безбедност на ОН што ја свика Русија на иницијатива на претставниците на Србите од Босна и Херцеговина. Редовната седница за Босна и Херцеговина е закажана за крајот на овој месец, но Жељка Цвијановиќ, членка на Претседателството на БиХ од РС, сакаше да го предупреди Советот за безбедност дека ситуацијата во земјата „се влошува поради предложената резолуција за Сребреница“.

Русија, која пред неколку години вложи вето на слична резолуција во Советот за безбедност, лобираше Цвијановиќ да се појави преку видеоврска.

БиХ со говор ќе ја претставува амбасадорот Златко Лагумџија, а ќе известува и Кристијан Шмит, висок претставник на меѓународната заедница.

Во меѓувреме, вчера во седиштето на ОН се одржа дискусија во врска со Резолуцијата за Сребреница.

Мајките на Сребреница се огласија на социјалната мрежа Х дека жртвите на геноцидот не смеат да се заборават и го предупредија светот дека такво нешто не треба да се повтори.

Вчера на панелот за Сребреница во ОН зборуваа претставници на здружението на семејствата на жртвите на геноцидот.