ОН: Во изминатите шест дена Украина ја напуштија над 660.000 цивили

ЖЕНЕВА (АА) - Повеќе од 660.000 цивили избегале од Украина во соседните земји во последните шест дена, според најновите владини податоци собрани од Агенцијата за бегалци на Обединетите нации, јавува Агенција Анадолија (АА).

„Со ова темпо, се чини дека ситуацијата ќе стане најголемата бегалска криза во овој век во Европа, а УНХЦР мобилизира ресурси за да одговори што е можно побрзо и ефективно“, рече портпаролката на УНХЦР, Шабија Манту, на прес-конференцијата во Женева.

„Сите соседни земји досега за пофалба ги држат своите граници отворени за бегалците што бегаат од Украина. Повеќето пребегаа во Полска, Унгарија, Молдавија, Романија, Словачка, додека други се преселија во други европски земји“, додаде таа.

Манту рече дека и ОН се свесни дека значителен број луѓе се преселиле во Русија.

„Националните власти ја преземаат одговорноста за регистрација, прием, сместување и заштита на овие бегалци“, додаде таа.

Војната на Русија против Украина влезе во шестиот ден, а руските сили напредуваат кон главниот град Киев.

Војната беше дочекана со незадоволство од меѓународната заедница, при што ЕУ, Велика Британија и САД спроведоа низа економски санкции кон Русија.