БЕРЛИН

Богатство во вредност од 1 милијарда евра е украдено од германски музеј, пишува германскиот весник „Билд“ (Bild), пренесува Агенција Анадолија (АА).

Зелениот трезор во Дрезден беше ограбен од крадци кои влегоа во зградата во раните утрински часови.

„Можеме да потврдиме дека е извршена кражба во Зелениот трезор“, изјави портпаролот на полицијата, Томас Гајтхнер.

„Истражната група за криминал е на местото на настанот. Сторителите се во бегство“, додаде тој. Гајтхнер информираше дека крадците во 5 часот наутро го прекинале снабдувањето со електрична енергија во зградата, пред да го пробијат прозорецот во музејот.

Спектакуларната кражба на уметнички дела е веројатно најголемата кражба на уметност во германската повоена историја. Бандата провалници украла историски накит, дијаманти и скапоцени камења.

Сепак, крадците можеби пропуштиле нешто. Иако го исклучиле напојувањето, се вели дека надзорната камера сè уште снимила видео од нив.

Зелениот трезор е светски познат по своето уметничко богатство. Во него има злато и скапоцени камења, порцелан, килибарни уметнички дела, неверојатни резби од слонова коска и семки од цреши. Во делото изработено од семки од цреши, во секоја од 185-те семки се врежани лица. Сите украдени предмети се бесценети уметнички дела.