Burak Bir
12 Јуни 2024•Ажурирај: 13 Јуни 2024
ЛОНДОН (АА) - Норвешка вчера ја повтори силната поддршка за Агенцијата на Обединетите нации за палестински бегалци (УНРВА), изразувајќи сочувство поради неодамнешните напади врз неа, јавува Анадолу.
Во соопштението на Министерството за надворешни работи на Норвешка, министерката за меѓународен развој Ане Беат Твинераим ја повтори поддршката на нејзината земја за УНРВА за време на состанокот во Јордан со генералниот комесар на Агенцијата, Филипе Лазарини.
„Го изразив моето сочувство за трагичната загуба на персоналот на УНРВА во Газа. Нападите врз Агенцијата се неприфатливи. Хуманитарните работници и инсталациите се заштитени според меѓународното право“, рече таа.
Во јануари избувна контроверзија бидејќи неколку илјади вработени во Агенцијата беа обвинети за учество во нападите врз Израел на 7 октомври од страна на палестинската група Хамас. Без да чекаат истрага, некои земји го повлекоа своето финансирање на Агенцијата, а Израел донесе мерки што отежнуваат да им се помогне на палестинските бегалци, и покрај предупредувањата дека тоа ќе ја спречи хуанитарната помош за Газа.
Во меѓувреме, Шведска го поздрави усвојувањето на резолуцијата на Советот за безбедност на ОН за поддршка на новиот патоказ за прекин на огнот објавен на 31 мај.
„Ситуацијата во Газа бара итен прекин на огнот, зголемен хуманитарен пристап и ослободување на сите заложници“, соопшти шведското Министерство за надворешни работи на Х, цитирајќи ја изјавата од понеделникот на Европската Унија за ова прашање.
Блокот во понеделникот соопшти: „ЕУ потсетува на својата целосна поддршка на сеопфатниот патоказ претставен од претседателот на САД, Џо Бајден. Ги повикуваме двете страни да го прифатат и имплементираат предлогот од три фази“.
Мајкл Мартин, министер за надворешни работи на Ирска, исто така, го поздрави усвојувањето на резолуцијата 2735 на Советот за безбедност на ОН, која повикува на итна примена на предлогот за прекин на огнот, велејќи дека мора да се види крајот на оваа брутална војна“.
„Ги повикувам сите страни веднаш да го прифатат и спроведат примирјето и мировниот план“, напиша тој на социјалната мрежа X.
Израел ја продолжува својата брутална офанзива врз Газа по нападот на Хамас минатиот октомври, и покрај резолуцијата на Советот за безбедност на ОН со која се бара итен прекин на огнот.
Оттогаш, повеќе од 37.000 Палестинци се убиени во Газа, повеќето жени и деца, а над 83.000 се повредени, според локалните здравствени власти.
По осум месеци од почетокот на израелската војна, огромни делови од Газа се во урнатини, а постои блокада на храна, чиста вода и лекови.
Израел е обвинет за геноцид пред Меѓународниот суд на правдата, чија последна пресуда му наложи веднаш да ја прекине својата операција во јужниот град Рафа, каде над милион Палестинци побараа засолниште од војната пред копнената офанзива врз градот на 6 мај.
