Никарагва ги прекина дипломатските односи со Еквадор

БОГОТА (АА) - Никарагва објави дека ги прекинала дипломатските односи со Еквадор откако полицијата изврши рација во амбасадата на Мексико во таа земја, известува Анадолу.

Владата на Никарагва се огласи во врска со рацијата спроведена во амбасадата на Мексико во Кито, главниот град на Еквадор, каде упадна полицијата и го приведе поранешниот потпретседател на Еквадор, Хорхе Глас, кој во амбасадата престојува од декември 2022 година.

Во соопштението се наведува дека по рацијата се прекинати сите дипломатски односи со Еквадор и се потсетува дека еквадорската влада го повлекла амбасадорот на Никарагва во Еквадор во 2020 година.

Никарагва ќе продолжи да го поддржува мексиканскиот претседател Андрес Мануел Лопез Обрадор и неговата влада.

По рацијата во мексиканската амбасада, голем број лидери, особено од латиноамериканските земји, го поддржаа Обрадор и реагираа против Еквадор.

Роберто Кансеко, службеник за политички прашања на амбасада, зборувајќи пред медиумите за вчерашниот инцидент, изјави дека еквадорската полиција влегла со сила и го нападнала персоналот.

Претседателот на Мексико Обрадор изјави дека упадот на еквадорската полиција во амбасадата е очигледно кршење на националниот суверенитет.

Напоменувајќи дека му наложил на министерот за надворешни работи да преземе правни мерки, претседателот Обрадор рече: „Ова е јасно кршење на меѓународното право и суверенитетот на Мексико. Дадов наредба веднаш да се прекинат дипломатските односи со владата на Еквадор“.