ГРАНД БЛАНК ТАУНШИП (АА) - Според првичните информации, најмалку четири лица се убиени, а осум се повредени во вооружениот напад што се случил за време на неделната служба во црква во американската сојузна држава Мичиген, известува Анадолу.

Локалната полиција објави дека вооружен маж извршил напад во црква во градот Гранд Блан за време на неделната служба.

Полицијата соопшти дека напаѓачот, лице на 40-годишна возраст, со автомобил дошол до црквата и потоа почнал да пука врз оние што присуствувале на службата.

Според првичните информации, во вооружениот напад се убиени четири лица, а осум се повредени. Полицијата соопшти дека потоа избувнал пожар во црквата и дека бројот на жртви може да се зголеми.

По инцидентот напаѓачот бил убиен од страна на двајца полицајци што се обидувале да го неутрализираат.

Голем број екипи се пратени на местото на нападот, а полицијата се сомнева дека пожарот во црквата бил намерно подметнат од напаѓачот.

- Напаѓачот е идентификуван како поранешен маринец

Бирото за алкохол, тутун, огнено оружје и експлозиви (АТФ) го идентификуваше напаѓачот како Томас Џејкоб Санфорд, 40-годишник од Бартон.

Полицаецот Вилијам Ренје изјави дека поранешниот американски маринец пристигнал во црквата со пикап на кој биле закачени две американски знамиња пред да излезе и да пука од огнено оружје.

Ренје рече дека откако напаѓачот излегол од црквата, бил гонет од двајца полицајци и застрелан по околу осум минути. ФБИ го опиша инцидентот како „насочен акт на насилство“.

Сепак, сè уште не е објавено соопштение во врска со мотивот на напаѓачот.

Претседателот Доналд Трамп, во изјавата на американската платформа за социјални медиуми Truth Social, потврди дека нападот бил „насочен акт на насилство“ врз христијаните и вети целосна поддршка на државните и локалните власти.