ЕРУСАЛИМ/ИСТАНБУЛ (АА) - Началникот на Генералштабот на израелската армија, Ејал Замир, денес ги претстави фазите од планот за целосна окупација на градот Газа и покрај индиректните преговори за евентуален прекин на огнот и договор за размена на затвореници меѓу Израел и палестинската група Хамас, јавува Анадолу.

Според израелскиот јавен радиодифузен сервис КАН, Замир го одобри планот во недела, а се очекува министерот за одбрана Израел Кац денес да го даде своето одобрение.

Претходно овој месец Владата на премиерот Бенјамин Нетанјаху усвои поширок предлог за постепено повторно окупирање на целиот Појас Газа, почнувајќи од градот Газа.

Во планот се предвидува принудно раселување на речиси еден милион Палестинци кон југ, опколување на градот и спроведување копнени напади врз станбени области.

На 11 август, како дел од првите чекори, израелската армија започна со големи напади врз населбата Зејтун во југоисточниот дел на градот Газа.

Сведоци рекоа дека во операцијата куќите биле кренати во воздух со роботи полни со експлозив, артилериски оган, неселективно пукање и масовно раселување.

Според израелскиот медиум „Вала“, планот на Замир вклучува „клучни принципи и лекции“ насочени кон тоа окупацијата да биде поефикасна.

Исто така, се повикува на зајакнување на армиските единици во северна Газа за да се отвори пат за преземање на градот, во согласност со кампањата на Израел за заострување на воениот притисок врз Хамас и заземање на областите под негова контрола. Поголем дел од задачите, се наведува во извештајот, ќе им бидат доделени на редовните сили.

Израелските подготовки за окупирање на градот се спроведуваат и покрај тековните преговори за прекин на огнот, при што Хамас го прифати предлогот посредуван од Египет и Катар за 60-дневен прекин на непријателствата.

Групата постојано изразуваше подготвеност да ослободи израелски заробеници во замена за крај на војната, целосно повлекување на израелските сили и ослободување на палестинските затвореници.

Израел уби повеќе од 62.000 Палестинци во Газа од октомври 2023 година. Воената кампања ја опустоши енклавата и ја доведе до раб на глад.

Минатиот ноември Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за своите воени дејства во енклавата.