ГАЗА/ИСТАНБУЛ (АА) - Израелската армија во Појасот Газа, од синоќа досега, уби повеќе од 100 Палестинци, меѓу кои 35 деца, прекршувајќи го договорот за прекин на огнот, според медицински лица, јавува Анадолу.
Портпаролот на Цивилната одбрана на Газа, Махмуд Басал, на американската социјална мрежа Фејсбук изјави дека над 100 луѓе, од кои 35 деца, биле убиени во „ужасни израелски масакри“ за помалку од 12 часа низ Појасот Газа.
„Овие масакри се извршуваат пред очите на посредниците и меѓународната заедница, која молчи и е неспособна да преземе конкретни чекори за да го запре континуираното крвопролевање што трае повеќе од две години“, рече портпаролот.
Според палестинската официјална новинска агенција ВАФА, повикувајќи се на болнички извори, во интензивните израелски напади се убиени 31 лице во северниот, 42 во централниот и 18 во јужниот дел на Појасот Газа.
Во израелските напади се погодени домови, шатори во кои се сместени раселените цивили, возило, засолниште и болница во рамките на таканаречената „жолта линија“, изјавија медицински лица за Анадолу.
„Жолтата линија“ се однесува на зоната во која израелските сили се повлекле според договорот за прекин на огнот. Тоа е физичка поделба што поминува низ Појасот Газа, делејќи ја палестинската територија на половина, а се наоѓа во Газа, јужно од градот Газа и северно од Кан Јунис.
Во северна Газа израелската армија изврши напад врз училиште претворено во засолниште во област во Беит Лахија, при што се убиени тројца цивили, а има и повредени.
Израелската армија гранатираше две куќи во населбата Ал-Наср и бегалскиот камп Шати во западниот дел на градот Газа, на север, при што се убиени осум лица.
Телото на млада Палестинка е извадено од урнатините на куќа во населбата Сабра, со што бројот на убиени цивили во нападот се искачи на пет.
Во нов израелски напад утринава е погодена џамија во која се засолнуваат раселени лица во населбата Сабра во градот Газа, изјавија очевидци за Анадолу.
Две лица се убиени, 10 се повредени во населбата Зејтун во градот Газа, а голем број цивили сè уште се водат како исчезнати под урнатините на куќа што била цел на нападите на израелската армија.
Неколкумина се ранети во друг напад југозападно од населбата Зејтун.
Палестинска мајка и нејзиното дете се убиени од израелската армија во населбата Тел ал-Хава во градот Газа.
Во централниот дел од Појасот Газа четири лица ги загубија животите откако во израелскиот напад бил погоден нивниот шатор во Деир ал-Балах.
Во јужните делови од градот двајца цивили го загубија животот, а неколкумина се повредени од израелската армија.
Шестмина ги загубија животите, а многумина се повредени кога израелските авиони го погодија училиштето пренаменето во засолниште и куќа во бегалскиот камп Бурејџ.
Пет лица се убиени во нападите насочени кон неколку домови во бегалскиот камп Нусејрат.
Во сличен напад, девет лица, од кои четири деца, се убиени, а деветмина исчезнаа под урнатините на куќа што е погодена од израелската армија во бегалскиот камп Нусејрат.
Осум лица, меѓу кои и три деца, се убиени во израелскиот оган врз шатори во кои се сместени раселени цивили во областа Ал-Маваси, западен Кан Јунис, во јужниот дел на Газа.
Медицински извори изјавија дека се очекува бројот на жртви да се зголеми, поради тоа што неколку лица се во критична состојба и во тек се потраги по исчезнатите под урнатините на уништените куќи.
Бруталните напади претставуваат прекршување на договорот за прекин на огнот што официјално стапи на сила на 10 октомври.
Првата фаза од договорот вклучува ослободување на израелските заложници во замена за речиси 2.000 палестински затвореници. Планот, исто така, предвидува обнова на Газа и воспоставување нов управувачки механизам без Хамас.
Израел уби повеќе од 68.500 Палестинци, повеќето жени и деца, а повреди над 170.000 во нападите врз Појасот Газа од октомври 2023 година.
