Burç Eruygur
11 Јуни 2023•Ажурирај: 12 Јуни 2023
ИСТАНБУЛ (АА) - Русија тврди дека Украина денес извршила напад врз брод од руската Црноморска флота, кој бил на задача да го осигури безбедното функционирање на гасоводите „Турски тек“ и „Син тек“, пренесува Анадолу.
„Денес, околу 01:30 часот по московско време, Вооружените сили на Украина направија неуспешен обид за напад на бродот 'Приазовје' на Црноморската флота, кој ги извршува задачите за мониторинг на ситуацијата и осигурување на безбедноста на маршрутите на 'Турски тек' и гасоводот 'Син тек'“, се вели во соопштението на руското Министерство за одбрана.
Се наведува дека „Приазовје“ ги уништил сите украински чамци што го почнале нападот без да претрпи никаква штета и дека нема жртви меѓу неговиот екипаж.
„Во овој период, како и за време на претходните слични напади, стратегискиот извидувачки дрон RQ-4B Global Hawk на американските воздухопловни сили спроведе извидување во воздушниот простор на централниот дел на Црно Море“, се нагласува во соопштението и се додава дека бродот продолжува со „извршување на своите задачи“.
Украинските власти сѐ уште не одговориле на соопштението.
Минатиот месец Русија тврдеше дека Украина го нападнала „Иван Курс“, уште еден брод од нејзината Црноморска флота задолжен за безбедно функционирање на двата гасовода.
