Москва: Во тек е борбата против украинските саботери на руска територија

МОСКВА (АА) - Во руската област Брјанск во тек е битката за неутрализирање на група украински саботери, соопштија денес руските власти, јавува Анадолу.

„Во граничниот округ Климовски во областа Брјанск, ФСБ (Федералната служба за безбедност) на Русија и силите на Министерството за одбрана на Руската Федерација преземаат мерки за уништување на вооружените украински националисти кои ја преминале државната граница“, соопшти службата за безбедност.

Според зборовите на гувернерот на Брјанск, Александар Богомаз, група украински „саботери“ утринава ја преминале границата со Русија.

„Денеска група за саботажа и извидување од Украина навлезе на територијата на округот Климовски во селото Љубечане. Саботерите пукале во автомобил. Еден жител загина, а десетгодишно дете е повредено“, објави Богомаз на Телеграм.

Цитирајќи повеќе извори во органите за спроведување на законот, руската државна новинска агенција ТАСС објави дека во тек е битката со „неколку десетици вооружени борци“ во селата Љубечане и Сушани.

Според ТАСС, Украинците зеле шест лица како заложници.