Мелони разговараше со Зеленски: Патот до мирот лежи во целосното повлекување на руските сили од украинската територија

РИМ (АА) - Италијанската премиерка Џорџа Мелони и украинскиот претседател Владимир Зеленски вчера остварија телефонски разговор во кој е истакната неопходноста од „праведен мир“ во Украина, пренесува Анадолу.

„Зеленски изрази благодарност за Римската конференција за обнова на Украина, закажана за 26 април, истакнувајќи дека тоа е важна можност за јакнење на односите помеѓу италијанските компании и Украина“, се вели во соопштението на Владата на Италија.

Украинскиот претседател ѝ се заблагодари на Мелони за посетата на Киев на 21 февруари и за нејзиното обраќање пред италијанскиот Парламент и пред Европскиот совет на 21 март.

Во соопштението се наведува дека Мелони и Зеленски разговарале за неопходноста од праведен мир и остварувањето на таа цел.

„Имав продуктивен разговор со Мелони. Разговаравме за нашите билатерални и меѓународни иницијативи. Патот до мир во Украина е преку целосно повлекување на руските сили од украинска територија и имплементација на нашата формула за мир. Им благодарам на нашите италијански пријатели за поддршката“, наведе Зеленски на социјалната мрежа Твитер во врска со разговорот.