Burak Bir
21 Август 2023•Ажурирај: 23 Август 2023
ЛОНДОН (АА) - Медицинската сестра Луси Летби е осудена на доживотна затворска казна за убиство на седум бебиња во неонаталното одделение во болницата „Каунтес оф Честер“ во Велика Британија, пренесува Анадолу.
Изрекувајќи ја пресудата за Летби, судијата Гос рече дека „влијанието на злосторството на Лети е огромно“ и предизвика „доживотна штета“.
„Во вашите постапки имаше длабока злонамерност што се граничи со садизам“, додаде Гос.
„За време на ова судење ладнокрвно негиравте каква било одговорност за вашето погрешно постапување и се обидувавте да им припишете некоја грешка на другите. Нема каење. Нема олеснителни фактори“, рече Гос.
Таа добива доживотна казна, што значи дека остатокот од животот ќе го помине в затвор.
Британскиот премиер Риши Сунак рече дека е „кукавички што луѓето што вршат такви ужасни злосторства не се соочуваат со своите жртви“.
По серијата делумни пресуди во текот на неколку дена, Летби во петокот беше осудена за убиство на седум бебиња и обид за убиство на шест други бебиња.
По двегодишна истрага полицијата во Чешир ја приведе 33-годишната медицинска сестра во јули 2018 година во нејзиниот дом и првично ја ослободи со кауција. Таа беше приведена уште трипати во следните години пред да биде обвинета во ноември 2020 година.
Истрагите започнаа кога се зголемил бројот на колапси, кои скоро биле фатални, и необјасниво починале предвреме родени бебиња во болницата во која работела како медицинска сестра од јуни 2015 до јуни 2016 година.
Полицискиот извештај покажа дека Летби им инјектирала воздух и вишок млеко на бебињата и ги отрула со инсулин.
