Велика Британија во 2025 година го забележа највисокиот годишен износ на извоз на одбранбена опрема во својата историја, покажуваат податоците на Владата, со склучени договори во вредност од над 20 милијарди фунти (околу 27 милијарди долари), што претставува најсилен резултат откако се води евиденција пред повеќе од 40 години, јавува Анадолу.

Во соопштението објавено денес британската Влада наведе дека договорите покажуваат брз напредок во спроведувањето на стратегискиот преглед на одбраната, со цел секторот да стане двигател на економскиот раст, истовремено зајакнувајќи ги воените врски со сојузниците од НАТО во услови на зголемени глобални тензии.

Меѓу клучните договори, како што соопштија министрите, е најголемиот извозен договор за воени бродови во историјата на земјата: договор од 10 милијарди фунти (13,5 милијарди долари) со Норвешка за најмалку пет фрегати од типот 26.

Се очекува договорот да поддржи околу 4.000 работни места низ Обединетото Кралство и да вклучи повеќе од 430 компании, од кои голем дел се мали и средни претпријатија.

Владата, исто така, го обезбеди и најголемиот договор за извоз на борбени авиони „во една генерација“, со продажба на 20 авиони „Тајфун“ на Турција, во вредност од 8 милијарди фунти (10,7 милијарди долари).

Министрите велат дека договорот ќе поддржи околу 20.000 работни места, особено во Ланкашир и Шкотска, а наедно ќе го зајакне јужното крило на НАТО.

„Повторно покажуваме како оваа Влада ја исполнува својата заложба да ја направи одбраната двигател на економскиот раст низ целата земја, истовремено зајакнувајќи ги нашата безбедност и безбедноста на нашите сојузници“, изјави државниот министер за подготвеност и индустрија во одбраната Лук Полард.

„Со склучувањето на историскиот договор за изградба на фрегати од тип 26 за Норвешка, го поттикнуваме растот во Шкотска и низ цела Велика Британија, а наедно подобро ги опремуваме нашите комбинирани морнарици за да ѝ се спротивставиме на заканата од Русија во Северниот Атлантик. А со извоз на борбени авиони 'Тајфун' во Турција обезбедуваме висококвалификувани работни места во Ланкашир, Шкотска и низ цела Велика Британија, а наедно помагаме во зајакнувањето на јужното крило на НАТО“, објасни тој.

„Посветени сме на соработка со нашите сојузници и одбранбените индустрии за да се осигуриме дека Велика Британија е лидер во глобалниот извоз на одбрана, а има уште многу што треба да се случи во 2026 година“, додаде тој.

Дополнително, извозот вклучува и продажба на 12 авиони Ц-130 на Турција, во вредност од над 550 милиони фунти (742 милиони долари) за британски одбранбени компании, меѓу кои и „Маршал аероспејс груп“, како и извоз на 18 воени транспортни возила произведени од компанијата „Супакат“ со седиште во Девон, на чешките вооружени сили, соопшти Владата.

Интензивирањето на извозот се одвива паралелно со пошироки иницијативи за одбранбена соработка, вклучително и нов договор со Норвешка за заеднички операции во Северниот Атлантик, продлабочени врски во рамките на пактот АУКУС со Австралија, како и неодамнешната одлука на Велика Британија да се приклучи кон Договорот за контрола на извозот на одбранбена опрема со Франција, Германија и Шпанија.

Британската статистика за извоз на одбранбена опрема се води од 1983 година, што ја прави 2025 година најпрофитабилна досега.